Fotografen Aude Osnowycz har vore i Vilnius og møtte kvinner som har flykta frå Russland og Belarus. I denne utgåva kan du òg lese om førtiårskrisa som har gjort Oda Malmin hekta på vevkunst, roadtripen til Ole Våge gjennom det rurale Spania, om då Dag H. Nestegaard var på leit etter gravstaden til Freddie Mercury og James Puchowski skriv om britisk utdanningspolitikk.
Har du lurt på kvifor sunnfjordingane var så spedalske på attenhundretalet? For det har kanskje Karl Egil Johansen funne ut av, Per Halse skriv om korleis nynorsk salmebok vart til, Gunnhild Øyehaug og Marit Kaldhol har vald ut to dikt frå Symra, medan Johannes Nymark spør om engelsk kjem til å vere verdsspråket for alltid. Håvard Klyve Parr grev i dei tidlege turistane til Geiranger og Heming H. Gujord ser tilbake på kattane han har hatt.
